Şairə, yazıçı-publisist Pərvanə Mehmanlının sayca doqquzuncu kitabı işıq üzü görüb.   
AYB-nin və AJB-nin üzvü, şairə, yazıçı-publisist Pərvanə Mehmanlının yeni işıq üzü görən “Demədimmi” kitabının təqdimat mərasimi Azərbaycan Yazıçılar Birliyinin “Natavan” zalında keçirilib.
Yeniproqnoz.az xəbər verir ki, tədbir Azərbaycan Respublikasının Dövlət Himninin səsləndirilməsi ilə açıq elan olunub. Daha sonra torpaqlarımızın azadlığı və ərazi bütövlüyü uğrunda canlarından keçərək şəhidlik zirvəsinə ucalan qəhrəman şəhidlərimizin əziz xatirəsi bir dəqiqəlik sükutla yad edilib.
 
Tədbirin aparıcısı Azərbaycan Respublikasının Əməkdar Mədəniyyət İşçisi, şair, yazıçı, jurnalist və Azərbaycan Yazıçılar Birliyinin İdarə Heyətinin üzvü Qəşəm Nəcəfzadə qonaqları salamlayaraq Pərvanə Mehmanlının yaradıcılığı, keçdiyi çətin və keşməkeşli həyat yolu, eləcə də ədəbi fəaliyyəti haqqında ətraflı məlumat verib. O, “Demədimmi” kitabının ərsəyə gəlmə tarixi və məzmunu barədə tədbir iştirakçılarını məlumatlandırıb.
 
Qeyd edək ki, kitabın ön sözü Qəşəm Nəcəfzadə tərəfindən yazılıb. 99 səhifədən ibarət olan şeir toplusunda lirika, fəlsəfi düşüncələr, sevgi, təbiət və vətənpərvərlik mövzularında qələmə alınmış əsərlər yer alıb.
 
Tədbirdə şəhid ailələrinin üzvləri, Qarabağ qaziləri, müxtəlif müəssisələrin rəhbərləri, media nümayəndələri, şair və yazıçılar, alimlər, professorlar, eləcə də Pərvanə Mehmanlının ailə üzvləri iştirak ediblər.
 
Çıxış edənlər müəllifin yaradıcılığını yüksək qiymətləndirərək ona yeni-yeni uğurlar arzulayıb, “Demədimmi” kitabının Azərbaycan ədəbiyyatına dəyərli töhfə olduğunu vurğulayıblar.
 
Sonda müəllif tədbirin təşkilində və təqdimatda iştirak edən hər kəsə təşəkkürünü bildirib, kitablarını oxucular üçün imzalayıb.