8 noyabr — Zəfər Günü münasibətilə Suraxanı rayon Heydər Əliyev Mərkəzində möhtəşəm tədbir keçirilib. “Dəmir Yumruq – Böyük Zəfər” adlanan bu tədbir Beynəlxalq Turan Dövlətləri Təşkilatının Azərbaycan təmsilçiliyi tərəfindən təşkil olunub.
Tədbirdə şəhid ailələri, qazilər, eləcə də bütün peşə sahələrindən insanlar iştirak ediblər. Gənc istedadlı uşaqlar vətənpərvərlik mövzusunda şeirlər səsləndirib, mahnılar ifa ediblər, qürur dolu anlar yaşadıblar.
Tədbiri təşkilatın Azərbaycan təmsilçisi Orxan Şahbazov açaraq qonaqları salamlayıb və bu günün əhəmiyyətindən danışıb. İlk olaraq Azərbaycan Respublikasının Dövlət Himni səsləndirilib, ardınca şəhidlərin ruhu bir dəqiqəlik sükutla yad olunub.
Daha sonra çıxış edən qonaqlar Zəfər Gününün tarixi əhəmiyyətindən, Azərbaycan ordusunun qəhrəmanlığından və Dəmir Yumruq əməliyyatının xalqımız üçün yaratdığı qürur hissindən bəhs ediblər.
Tədbirin sonunda iştirakçılara və fərqlənən şəxslərə diplom və ödüllər təqdim olunub.
Bu möhtəşəm tədbir həm Zəfər Gününün ruhuna, həm də şəhidlərin əziz xatirəsinə dərin ehtiramın ifadəsi olub.