"Uşaqlarda reproduktiv sistemin patologiyalarına və cinsi anomaliyalara multidissiplinar yanaşma” mövzusunda elmi-praktik konfrans keçirilib.
Tarix: 6-10-2025, 17:10 |
“Uşaqlarda reproduktiv sistemin patologiyalarına və cinsi anomaliyalara multidissiplinar yanaşma”
Azərbaycan Respublikası Səhiyyə Nazirliyi, nazirliyin K.Y.Fərəcova adına Elmi-Tədqiqat Pediatriya İnstitutu, Azərbaycan Tibb Universiteti və Azərbaycan Uşaq Cərrahları Assosiasiyasının birgə təşkilatçılığı ilə 4 oktyabr 2025-ci il tarixində “Uşaqlarda reproduktiv sistemin patologiyalarına və cinsi anomaliyalara multidissiplinar yanaşma” mövzusunda elmi-praktik konfrans keçirilib.
Tədbir Vətənə sədaqət və milli dəyərlərə hörmət ruhunda başlayıb. Konfransdan öncə qısa konsert proqramı təqdim olunub, Vətən uğrunda canından keçmiş qəhrəman şəhidlərimizin əziz xatirəsi bir dəqiqəlik sükutla yad edilib. Ardınca Azərbaycan Respublikasının Dövlət Himni səsləndirilib və vətənpərvərlik ruhunu əks etdirən videoçarx nümayiş olunub.
Açılış mərasimində Səhiyyə Nazirliyi Səhiyyə siyasəti şöbəsinin müdiri Ramik Quliyev, Azərbaycan Tibb Universitetinin professoru, t.e.d. Məlahət Sultan, Uşaq Cərrahları Assosiasiyasının sədri professor Ramiz Poluxov və ETPİ-nin direktoru dosent Aynur Poluxova çıxış edərək uşaqlarda reproduktiv sağlamlığa kompleks yanaşmanın əhəmiyyətini vurğulayıblar.
Tədbirin əsas məqsədi uşaqlarda reproduktiv sistem pozuntularının və cinsi inkişafla bağlı anomaliyaların diaqnostikası və müalicəsində multidissiplinar yanaşmanın vacibliyini vurğulamaq, bu sahədə mütəxəssislər arasında əməkdaşlığı gücləndirmək olub.
Konfrans çərçivəsində iki əsas panel sessiyası keçirilib.
Pediatrik endokrinologiya panelində 5 həkim mütəxəssis uşaqlarda yaş dövrlərindən asılı olaraq cinsi inkişafın xüsusiyyətləri, adrenogenital sistem pozğunluqları zamanı pediatrın yanaşması, vaxtından əvvəl cinsi yetişkənlik, anadangəlmə adrenal hiperplaziya və mozaik Terner sindromu, eləcə də erkən cinsi inkişaf zamanı final boy proqnozuna müasir yanaşmalar kimi aktual mövzularda elmi çıxışlar ediblər. Panelə professor Nailə Sultanova, professor Rəqsanə Məmmədova və dosent Gündüz Əhmədov moderatorluq ediblər.
Cərrahi panel çərçivəsində isə 5 həkim mütəxəssis uşaqlarda reproduktiv sistemin patologiyalarının və cinsi inkişaf anomaliyalarının diaqnostika və müalicəsində laparoskopiyanın rolu, böyrəküstü vəzin hiperplaziyası zamanı feminizasiyaedici cərrahiyyənin xüsusiyyətləri, xaya burulmaları zamanı diaqnostika və cərrahi taktikanın bəzi aspektləri, kriptorxizmin diaqnostikası və müalicəsi, eləcə də hipospadiyaların müasir müalicə üsulları kimi klinik əhəmiyyətli mövzularda təqdimatlar ediblər. Panelin moderatorları professor Ramiz Poluxov, professor Rauf Bəylərov və dr. Umud Musayev olmuşdur.
Konfrans iştirakçıları tərəfindən təqdim olunan elmi çıxışlar və praktik nümunələr böyük maraqla qarşılanıb. Ümumilikdə 250 nəfərin iştirakı ilə keçirilən tədbirin sonunda iştirakçılar belə toplantıların davamlı təşkilinin elmi biliklərin artırılması və klinik praktikada tətbiqi baxımından xüsusi əhəmiyyət daşıdığını qeyd ediblər.
