Zaqatala rayonu Bəhmətli kənd Ə.Cavadov adına tam orta məktəbində "Onlayn Ünsiyyət üzrə Beynəlxalq Sertifikasiya" layihəsi çərçivəsində təlimlərin keçirilməsinə start verildi.
Təlimlər zamanı müəllimlər və inzibati heyət onlayn əməkdaşlıq və rəqəmsal ünsiyyət bacarıqları üzrə biliklərini artırırlar. Proqram çərçivəsində iştirakçılara bulud texnologiyalarından istifadə, mobil əməkdaşlıq alətləri və internet təhlükəsizliyi kimi mövzular üzrə nəzəri və praktik biliklər tədris olunur.
Təlimlər ICDL sertifikatlı mütəxəssislər tərəfindən aparılır. Layihənin əsas məqsədi, iştirakçıları beynəlxalq standartlara uyğun "ICDL Workforce Online Collaboration" sertifikatı ilə təmin etməkdir. Bu sertifikat onlara müasir rəqəmsal texnologiyaların tətbiqi ilə tədris və idarəetmə prosesini daha effektiv həyata keçirmək imkanı yaradır.
Layihə rəhbəri Aliyə Süleymanova bildirib ki, təlimlərdən sonra iştirakçılar beynəlxalq sertifikasiya imtahanında iştirak edəcək və uğurlu nəticələr əldə edənlər müvafiq sertifikatla təltif olunacaqlar.