Təhsildə İnkişaf və İnnovasiyalar üzrə VIII Qrant müsabiqəsinin qalibi "LESSON STUDY Step by Step-tədrisdən tədqiqata doğru" layihəsinin icrası üzrə işlər davam edir. Layihənin fəaliyyət planına əsasən 04-07.11.2024-cü il tarixləri aralığında layihə çərçivəsində əməkdaşlıq ediləcək Nəsimi rayonu 247, Suraxanı rayonu 279 və Sabunçu rayonu 75 nömrəli tam orta məktəblərin rəhbər heyəti ilə görüşlər keçirildi. Görüşdə  məktəb rəhbərliyi, o cümlədən, layihə çərçivəsində həmin məktəblərdə təlimçi -mentor qismində fəaliyyət göstərəcək Naidə İbrahimova, Könül Seyidova və Könül Əliyeva da iştirak etmişdir. Görüş zamanı rəhbər heyətə layihənin məqsədi, bu məqsəddən irəli gələn vəzifələr, görüləcək işlər, icra müddəti, gözlənilən nəticələr-layihənin müəllim və şagirdlərə verə biləcəyi töhfələr, layihə çərçivəsində qurulacaq əməkdaşlıqlar, layihənin monitorinqi və davamlılığı, hesabatlılıq və s. haqqında ətraflı məlumat verilmişdir. Daha sonra aşağıdakı mövzularda müzakirələr aparıldı: 1. Tədqiqatın aparılacağı fənn və sinif seçimi. 2. Tədqiqat qruplarında iştirak edəcək müəllimlərin seçimi; (ibtidai siniflər və fənn müəllimləri üzrə) 3. Layihə çərçivəsində keçiriləcək təlimlərdə müəllimlərin iştirakının təmin edilməsi və s. Görüşün təşkilində göstərdiyi dəstəyə, yaratdığı səmimi və pozitiv mühitə görə 247 nömrəli tam orta məktəbin direktoru Sitarə Abbasovaya, 279 nömrəli tam orta məktəbin direktoru Südabə Abdullayevaya, 75 nömrəli tam orta məktəbin direktoru Günel İbrahimovaya təşəkkür edirik.