Gənc muğam ifaçısı Yusif Hüseynlinin uğur yolu
Tarix: 1-03-2026, 23:10 |
Gənc muğam ifaçısı Yusif Hüseynlinin uğur yolu
Hüseynli Yusif Elman oğlu 2011-ci ilin 11 oktyabr tarixində Səbail rayonunda anadan olmuşdur. Kiçik yaşlarından incəsənətə böyük maraq göstərmiş, xüsusilə muğam sənətinə dərin sevgi bəsləmişdir. Hazırda 9-cu sinifdə oxuyur və incəsənət gimnaziyasında muğam təhsili alır.
Yusifin istedadı və zəhməti artıq öz bəhrəsini verməkdədir. O, Bakı şəhərində keçirilən və Elm və Təhsil Nazirliyi tərəfindən təşkil olunan, türkdilli xalqların məktəblilərinin iştirakı ilə baş tutan “Şuşa türk xalqları birliyinin mədəniyyət incisidir” adlı beynəlxalq uşaq yaradıcılıq festivalında uğurla çıxış etmişdir. Yaradıcılıq nailiyyətlərinə görə Fəxri Fərmanla təltif olunması onun sənət yolunda qazandığı önəmli nailiyyətlərdən biridir.
Muğam Azərbaycan xalqının milli sərvəti, mənəvi xəzinəsidir. Yusif bu müqəddəs sənəti dərindən öyrənərək gələcəkdə muğamımızı həm vətənimizdə, həm də xarici ölkələrdə layiqincə təmsil etməyi ən böyük arzusu hesab edir. Onun məqsədi Azərbaycan musiqisini dünyaya tanıtmaq, muğamın gözəlliyini beynəlxalq səviyyədə nümayiş etdirməkdir.
Qeyri -Hökumət təşkilatlarına Dövlət Dəstəyi Agentliyinin dəstəyilə icra olunan "Parlaq Ulduzlar" layihəsi çərçivəsində keçirilən Muğam Müsabiqəsinin qalibi olub. (l dərəcəli)
“İstedadları Tanıyaq və Tanıdaq” İctimai Birliyinin bir qrup istedadlı üzvləri Dünya TV-nin “Bu səhər” verilişində qonaq olublar. Verilişdə birliyin fəaliyyəti, istedadlı uşaq və gənclərin inkişafı, eləcə də ailə-məktəb-müəllim əməkdaşlığının əhəmiyyəti geniş müzakirə olunub. Tədbir çərçivəsində bir sıra istedadlı gənclər mükafatlandırılıb. “İlin fəal gənci” fəxri diplomu ilə təltif olunanlar arasında gənc xanəndə Yusif Hüseynli də olub.
Həmçinin Azərbaycan Respublikası Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyini dəstəyi və Gənclərin Respublika Bədii Yaradıcılıq Evinin təşkilatçılığı ilə Bakı şəhəri üzrə ümumtəhsil məktəblərinin şagirdləri və uşaq-gənclər inkişaf mərkəzlərinin dərnək üzvləri arasında keçirilən "Bahar nəğmələri" müsabiqənin qalibi olub. ( ll yer )
Ustadı Musaəli Vüqar və Aytən Məhərrəmovadır. İstedadı, əzmi və zəhmətsevərliyi ilə Hüseynli Yusif Elman oğlu gələcəyin uğurlu muğam ifaçılarından biri olmağa namizəddir. Onun uğur yolu yeni başlayır və qarşıda onu daha böyük nailiyyətlər gözləyir.
