“Beynəlxalq Sertifikatlı Rəqəmsal Müəllim” qrant layihəsi çərçivəsində təlimlər uğurla davam edir.
İcxeberler.com xəbər verir ki, layihə üzrə 30 nəfər müəllim üçün “ICDL – Kompüter və onlayn əsaslar” proqramı əsasında nəzəri və praktik məşğələlər təşkil olunur.
Təlimlər zamanı müəllimlərin kompüterdən və onlayn mühitdən səmərəli istifadə bacarıqları inkişaf etdirilir, əldə olunan biliklər praktiki tapşırıqlar vasitəsilə möhkəmləndirilir. Proses iştirakçıların rəqəmsal bacarıqlarının artırılmasına, müasir texnologiyalardan istifadədə daha çevik və inamlı olmalarına şərait yaradır.
Layihənin sonunda iştirakçılar beynəlxalq ICDL sertifikasiya imtahanında iştirak edəcək və nəticələrə uyğun olaraq beynəlxalq sertifikat əldə edəcəklər. Bu isə məktəbdə müasir tədris mühitinin formalaşmasına və təhsilin keyfiyyətinin yüksəldilməsinə mühüm töhfə verəcək.
Xatırladırıq ki, “Beynəlxalq Sertifikatlı Rəqəmsal Müəllim” qrant layihəsi Təhsildə İnkişaf və İnnovasiyalar üzrə IX Qrant Müsabiqəsinin qalib layihələrindəndir və Aytən Bağıyeva tərəfindən Bakı şəhər 36 nömrəli tam orta ümumtəhsil məktəbində həyata keçirilir. Layihənin əsas məqsədi məktəbin 30 nəfər müəlliminin kompüter proqramlarından istifadə üçün zəruri bilik və bacarıqlar qazanmalarına dəstək vermək, onları “ICDL – Kompüter və onlayn əsaslar” (ICDL – Computer and Online Essentials) beynəlxalq sertifikasiyasına hazırlamaq və imtahanda iştiraklarını təmin etməkdir.