QHT “Parlaq Ulduzlar”- gənc istedadların tanıdılması layihəsi çərçivəsində Muğam Müsabiqəsi keçirdi
Tarix: 29-06-2025, 19:32 |
Bakıda “Parlaq Ulduzlar”- gənc istedadların tanıdılması layihəsi çərçivəsində Muğam Müsabiqəsi keçirildi.
28 İyun 2025-ci il Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “İstedadları Tanıyaq və Tanıdaq” İctimai Birliyi tərəfindən həyata keçirilən “Parlaq ulduzlar – gənc istedadların tanıdılması” layihəsi çərçivəsində Muğam müsabiqəsi keçirilib.
Layihənin rəhbəri, Birliyin sədri Vüsalə Qələndərlinin sözlərinə görə, müsabiqədə məqsəd muğam sənətinə marağı olan uşaq və gəncləri üzə çıxarmaq və onların inkişafına dəstək verməkdir.
Müsabiqəyə Bakı, ətraf kəndlər və regionlardan olan gənc ifaçılar qatılıb. Onlar səhnədə muğam sənəti üzrə bacarıqlarını nümayiş etdiriblər və çıxışları münsiflər heyəti tərəfindən yüksək qiymətləndirilib.
Tanınmış sənət adamlarının və media nümayəndələrinin yer aldığı münsiflər heyəti aşağıdakılardan ibarət olub:
2013-cü il Televiziya Muğam Müsabiqəsinin qalibi, Azərbaycan Dövlət Televiziyası və Beynəlxalq Muğam Mərkəzinin solisti Ayşən Mehdiyeva;
Xanəndə, metodist, Birliyin fəxri üzvü Vəsilə Quliyeva;
Jurnalist Xanım Bağırlı;
Tanınmış sənətçi Habil Şınıxlı.
Tədbirdə şəhid Ağacavad Mütəllimzadənin anası Nailə xanım da iştirak edib. O, istedadlı uşaqlara xeyir-dua verərək onların parlaq gələcəyinə inandığını bildirib.
Qeyd edək ki, layihə çərçivəsində növbəti müsabiqələr iyul ayında keçiriləcək və bu dəfə rəqs, qiraət və digər sahələr üzrə istedadlı uşaqlar və gənclər öz bacarıqlarını nümayiş etdirəcəklər.
Qeyd edək ki, müsabiqə İstedadları Tanıyaq və Tanıdaq ictimai birliyinin ofisində kecirilib. İfaçılari canlı müşaiyət edib: Tarda- Fəxri Mədəniyyət işçisi, Tarzən, İstedadları Tanıyaq və Tanıdaq ictimai birliyinin Fəxri üzvü İntiqam Abbasov, Kamançada: Respublika və Beynəlxalq müsabiqələr qalibi, Azərbaycan Milli Konservatoriyasının tələbəsi, İstedadları Tanıyaq və Tanıdaq ictimai birliyinin Fəxri üzvü Əli Rüstəmbəyli, Qarmonda: İstedadları Tanıyaq və Tanıdaq ictimai birliyinin üzvü Bahadur Cabbarov.
