Onlayn əməkdaşlıq üzrə beynəlxalq sertifikasiya layihəsinin uğurla yekunlaşdı
Tarix: 28-03-2025, 16:07 |
Rəqəmsal bacarıqların inkişafına doğru: Onlayn əməkdaşlıq üzrə beynəlxalq sertifikasiya layihəsinin uğurla yekunlaşdı
Müasir təhsil sistemi pedaqoqların yalnız akademik biliklərə deyil, eyni zamanda rəqəmsal bacarıqlara və qlobal əməkdaşlıq mühitinə uyğunlaşmasına ehtiyac duyur. Bu istiqamətdə uğurla həyata keçirilmiş “Onlayn ünsiyyət üzrə beynəlxalq sertifikasiya” layihəsi, təhsildə rəqəmsal transformasiyanın bölgələrdə də mümkünlüyünü bir daha nümayiş etdirdi. Layihənin rəhbəri – Bəhmətli kənd Ə.Cavadov adına tam orta məktəbin müəllimi Süleymanova Aliyə – təşəbbüs göstərərək məktəb heyətinin peşəkar inkişafına dəyərli töhfə verdi.
Layihənin əsas məqsədi 30 nəfərlik pedaqoji heyətin ICDL Workforce Online Collaboration modulu üzrə beynəlxalq standartlara uyğun təlim keçməsi və sertifikasiya əldə etməsi idi. İlk mərhələdə təlim məzmunu Azərbaycan dilinə tərcümə olundu və təlimçilərin istifadəsinə uyğunlaşdırıldı. Peşəkar tərcümə və adaptasiya nəticəsində təlim modulları yerli müəllimlərin daha rahat mənimsəyə biləcəyi formata salındı.
Ardınca xüsusi təlim proqramı hazırlandı və müəllimlər üçün 15 günlük intensiv təlim sessiyaları keçirildi. Bu sessiyalarda həm nəzəri biliklər, həm də praktik vərdişlər interaktiv metodlarla öyrədildi. Təlimlər zamanı qrup işi, təqdimat, praktiki tapşırıqlar kimi metodlardan istifadə edilərək müəllimlərin aktiv iştirakı təmin edildi. Tədrisin keyfiyyəti layihə ekspertləri və təlimçiləri tərəfindən daim izlənildi.
Layihənin növbəti mərhələsində iştirakçılar ICDL Authorized Testing Centers-də imtahanlara cəlb olundu. Bu məqsədlə beynəlxalq vauçerlər əldə edilərək 30 nəfərə təqdim edildi və texniki-inzibati dəstək göstərildi. Nəticədə müəllimlərin əksəriyyəti imtahanları uğurla başa vuraraq beynəlxalq ICDL sertifikatları qazandı.
Layihənin bağlanış tədbiri də xüsusi diqqətəlayiq oldu. Tədbir zamanı layihənin gedişi, əldə olunmuş nəticələr və gələcək istiqamətlər ətrafında təqdimatlar edildi. Sertifikatlar təqdim olunaraq müəllimlərin uğurları qeyd edildi, iştirakçılar layihə rəhbərinə və komandaya minnətdarlıqlarını bildirdilər.
Layihənin əsas nəticələri bunlardır:
30 nəfər müəllim beynəlxalq səviyyəli onlayn əməkdaşlıq və ünsiyyət bacarıqlarını mənimsədi;
Müəllimlərin əksəriyyəti ICDL sertifikatı alaraq peşəkar inkişaf yolunda mühüm addım atdı;
Məktəbin təlim mühiti daha innovativ və texnologiya yönümlü hala gəldi;
Rəqəmsal bacarıqların artırılması müəllim-şagird münasibətlərinə də müsbət təsir göstərdi;
Layihə region məktəblərində beynəlxalq sertifikatlı təlimlərin keçirilməsinin mümkün olduğunu nümayiş etdirdi.
Bu layihə Süleymanova Aliyənin liderliyi, peşəkarlığı və təşəbbüskarlığı sayəsində reallaşdı. Onun rəhbərliyi ilə məktəb kollektivi yalnız bilik və bacarıq baxımından deyil, həm də əməkdaşlıq ruhunda bir araya gəldi. Bu təşəbbüs, bölgələrdə müəllimlərin inkişafına dəstək verən uğurlu model kimi qiymətləndirilə bilər.
