“Onlayn komanda işinin təşkili üzrə beynəlxalq sertifikasiya” layihəsi çərçivəsində təlimlər davam edir

Layihə C.Səfərov adına 10 nömrəli tam orta ümumtəhsil məktəbində icra olunur. Təlimlər Aygün Cəfərova tərəfindən aparılır və məktəbin 30 nəfər müəllimini əhatə edir. Təlimlərin əsas məqsədi iştirakçıların onlayn komanda işinin təşkili, rəqəmsal əməkdaşlıq alətlərindən səmərəli istifadə və virtual mühitdə birgə fəaliyyət bacarıqlarının beynəlxalq standartlara uyğun şəkildə inkişaf etdirilməsidir. Ümumilikdə 30 saatlıq proqram gündə 3 saat olmaqla 10 gün ərzində həyata keçirilir.

Proqram çərçivəsində müəllimlərə rəqəmsal platformalarda effektiv əməkdaşlıq, tapşırıqların onlayn mühitdə planlaşdırılması və idarə olunması, komanda üzvləri arasında kommunikasiya strategiyaları və birgə sənəd dövriyyəsinin təşkili kimi mövzular üzrə praktiki bilik və bacarıqlar aşılanır.

Layihənin əsas hədəfi məktəbdə müəllimlərin onlayn komanda işi üzrə zəruri səriştələrini formalaşdırmaq və onları ICDL tərəfindən təqdim olunan “ICDL Workforce Teamwork” beynəlxalq sertifikasiyasının tələblərinə uyğun şəkildə hazırlamaqdır. Layihənin icrası müəllimlərin rəqəmsal transformasiya prosesinə daha fəal inteqrasiyasına və tədris prosesində müasir əməkdaşlıq modellərinin tətbiqinə töhfə verir.

 #IXQrant #TəhsildəQrantlar #EduGrants