“İstedadları Tanıyaq və Tanıdaq” İctimai Birliyinin sədri Vüsalə Sadıqova (Qələndərli) QHT.az-a təşkilatın 2025-ci il üçün əsas prioritetlərini açıqlayıb. O, istedadlı gənclərin inkişafını dəstəkləmək və onların cəmiyyətə faydalı töhfələr verməsini təmin etmək üçün bir neçə istiqamətdə fəaliyyət göstərəcəklərini bildirib.
Təşkilatın 2025-ci il üçün hədəfləri:
İstedadların inkişafı: Gənclərin və istedadlı şəxslərin inkişafını dəstəkləmək məqsədilə təlimlər, masterklasslar və mütəxəssislərin mentorluğu ilə proqramlar təşkil ediləcək.
Təhsilin keyfiyyətinin artırılması: Müxtəlif sahələrdə təhsilin keyfiyyətini artırmaq üçün xüsusi layihələr həyata keçiriləcək və yeni əməkdaşlıqlar qurulacaq.
İctimai maarifləndirmə: İstedadların tanınması və cəmiyyət tərəfindən dəyərləndirilməsi üçün müsabiqələr, sərgilər və konfranslar təşkil olunacaq.
Şəbəkələşmə: İstedadlı şəxslər arasında əlaqələri genişləndirmək, mübadilə proqramları və yeni əməkdaşlıq imkanları yaratmaq planlaşdırılır.
Dövlət və özəl sektorla əməkdaşlıq: Dövlət orqanları və özəl sektorla birgə istedadlı şəxslər üçün yeni imkanların yaradılması nəzərdə tutulur.
Vüsalə Sadıqova bildirib ki, bu fəaliyyətlər gənclərin potensialını artırmaqla yanaşı, onların cəmiyyətə inteqrasiyasını və ölkənin inkişafına töhfə verməsini dəstəkləyəcək.

 
Pərvanə Fərhadqızı