“İstedadları Tanıyaq və Tanıdaq” İctimai Birliyinin dövlət qeydiyyatına alınmasının 4-cü, ümumi fəaliyyətinin isə 8-ci ildönümü münasibətilə “Dostluq Körpüsü” adlı konsert tədbiri təşkil olunub.  Tədbirdə millət vəkili Vüqar İskəndərov,  Şəhid Yusifzadə Ramilin anası Reyhan xanım Yusifzadə, şəhid Tural Dəmirçiyevin anası Sədaqət xanım Dəmirçiyeva, Vətən müharibəsi qazisi Abdulla İsmayılov, QHT sədrləri, jurnalistlər, ziyalılar, mədəniyyət və incəsənət xadimləri, ictimaiyyətin fəal üzvləri və müxtəlif regionlardan gəlmiş istedadlı gənclər iştirak edib. 

Tədbirin əsas məqsədi ölkəmizdəki istedadlı uşaqların və gənclərin tanıdılması, onların yaradıcılıq potensialının dəstəklənməsi, həmçinin müxtəlif bölgələr arasında mədəni körpülərin qurulması olub.

Konsert proqramında müxtəlif yaş qruplarından olan istedadlı ifaçılar musiqi, rəqs, şeir və digər növ çıxışlarla tamaşaçılar qarşısında çıxış ediblər. Tədbirin sonunda birliyə dəstək göstərən şəxslərə təşəkkürnamələr təqdim olunub.

"İstedadları Tanıyaq və Tanıdaq" İctimai Birliyi fəaliyyət göstərdiyi illər ərzində yüzlərlə gəncin üzə çıxarılmasına və onların müxtəlif səviyyəli layihələrə cəlb olunmasına önəmli töhfə verib. Birlik bu istiqamətdə fəaliyyətini genişləndirməkdə və yeni layihələrlə çıxış etməyə davam etməkdədir.