Fransa millisinin hücumçusu, “Qızıl top” mükafatının sahibi Kərim Benzema Səudiyyə Ərəbistanının “Əl-Hilal” futbol klubu ilə müqavilə imzalayıb.
Axar.az Teleqraf-a istinadən xəbər verir ki, bu barədə klubun mətbuat xidməti məlumat yayıb.
38 yaşlı futbolçu ilə imzalanan müqavilənin müddəti açıqlanmayıb.
Qeyd edək ki, Benzema 2023-cü ildən etibarən “Əl-İttihad” klubunun formasını geyinib. O, bu komanda ilə 2025-ci ildə Səudiyyə Ərəbistanı çempionu olub. Yanvarın 29-da Fransanın “L’Ekipp” qəzeti Benzemanın maaşının azaldılması ilə bağlı təklif edilən yeni müqavilə səbəbindən “Əl-İttihad”da çıxış etməkdən imtina etdiyini yazıb.
Kərim Benzema daha əvvəl İspaniyanın “Real Madrid” və Fransanın “Lion” klublarında çıxış edib. Madrid təmsilçisinin heyətində o, dörd dəfə İspaniya çempionu olub, üç dəfə ölkə kubokunu qazanıb, beş dəfə isə Çempionlar Liqasının qalibi adını qazanıb.
2022-ci ildə Benzema Fransanın “France Football” jurnalının versiyasına görə dünyanın ən yaxşı futbolçusuna verilən “Qızıl top” mükafatına layiq görülüb. O, “Real Madrid”in heyətində 648 oyun keçirib, 354 qol vurub və klub tarixinin bombardirləri siyahısında ikinci yerdə qərarlaşıb.
Benzema Fransa millisində 2007–2022-ci illərdə çıxış edib, 97 oyunda 37 qol vurub. O, 2021-ci ildə milli komanda ilə birlikdə Millətlər Liqasının qalibi olub, 2022-ci il dünya çempionatında isə Fransa yığması ilə gümüş medal qazanıb.