Duz gündəlik qidalanmanın ən sadə, amma ən vacib hissələrindən biridir. Çox insan duzu sadəcə “dad verən maddə” kimi görsə də, əslində orqanizmdə su balansı, sinir sistemi və təzyiq tənzimlənməsində mühüm rol oynayır. Son illərdə isə tez-tez belə sual yaranır: sağlamlıq üçün hansı duz daha yaxşıdır — təmizlənmiş ağ duz, yoxsa dəniz duzu?
Axar.az Medicina.az-a istinadən xəbər verir ki, təmizlənmiş süfrə duzu növü gündəlik marketlərdə ən çox rast gəlinən formadır. Emal prosesi zamanı təmizlənir və çox vaxt yod əlavə edilir.
Üstünlükləri:
Yodlaşdırılmış olması qalxanabənzər vəzi (tiroid) üçün vacibdir, tərkibi standartdır və nəzarət olunur, gündəlik istifadə üçün əlçatandır.
Mənfi tərəfləri:
Təbii minerallarının çoxu çıxarılıb, həddindən artıq istifadə edildikdə təzyiqi yüksəldə bilər.
Dəniz duzu:
Dəniz suyunun buxarlanması ilə əldə olunan bu duz daha təbii hesab edilir.
Üstünlükləri:
Az miqdarda təbii minerallar (maqnezium, kalsium və s.) saxlayır, dadı daha yumşaq və təbii ola bilər
Mənfi tərəfləri:
Çox vaxt yodlaşdırılmır, mineralların miqdarı çox azdır, tibbi baxımdan ciddi fərq yaratmır. Yenə də əsas tərkib natriumdur
Hansı daha sağlamdır?
Elmi baxımdan əsas nəticə belədir: Duzun növündən daha vacib olan onun miqdarıdır.
Sağlam insan üçün gündəlik tövsiyə (təxminən 5 qramdan az duz): Əgər duz çox istifadə olunarsa, təzyiq yüksələ bilər, böyrəklərə yük artırar, ürək-damar sistemi risk altına düşə bilər.
Dəniz duzu tam sağlam, süfrə duzu isə zərərli deyil. Hər iki növ duz orqanizm üçün lazımdır, amma əsas məsələ balansdır. Əgər yod çatışmazlığı riski varsa, yodlaşdırılmış süfrə duzu daha praktik seçim ola bilər. Digər hallarda isə az və ölçülü istifadə sağlamlığın qorunması üçün kifayətdir.