2025-ci ildə səhmlərində dövlətin payı olan müəssisələr dövlət büdcəsinə ümumilikdə 636,6 milyon manat dividend ödəyib.
APA xəbər verir ki, bu, Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəyə çıxarılan “Azərbaycan Respublikasının 2025-ci il dövlət büdcəsinin icrasına dair illik hesabat”ında əksini tapıb.
Hesabata əsasən, dividend ödənişlərinin 461,5 milyon manatı SOCAR-ın, 175,1 milyon manatı isə ABB-nin (Azərbaycan Beynəlxalq Bankı) payına düşüb.
Ümumilikdə, sair daxilolmalar üzrə dövlət büdcəsinə 861 milyon manat proqnoza qarşı 1 milyard 252,3 milyon manat vəsait daxil olub. Bu, proqnozdan 391,3 milyon manat və ya 45,5% çoxdur.
Sair daxilolmaların strukturunda dövlət şirkətlərindən alınan dividendlər 50,8%-lik payla əsas mənbə olub. Digər daxilolmalar arasında dövlət büdcəsindən maliyyələşən təşkilatlar tərəfindən ödənilən gömrük yığımları və cərimələr (173,7 milyon manat), istifadə olunmamış qalıqlar üzrə daxilolmalar (157,8 milyon manat), vahid xəzinə hesabının sərbəst qalığının idarə edilməsindən əldə olunan gəlirlər (136 milyon manat) və digər mənbələr yer alıb.